ఆమె యవ్వనవతి, అందగత్తె ఆమె శరీరాన్ని నులివెచ్చన చేసే సూర్యరశ్మిలా కొద్దిగా బంగారు మెరుపు ఉంది ఆమెలో. కానీ, ఆమె నల్లజాతి యువతి కావడంతో ‘మేవిల్లే ‘ లో ఆమెకి చోటు లేదు ఆమె మనసులో జ్వలిస్తూ స్వచ్ఛమైన జ్వాలలా పైకి ఎగసిపడే ఆనందానికి అవకాశాలూ లేవు.
ఒక రోజు మిసెస్ లాథామ్ ఇంటి వెనక పెరట్లో గిన్నెలు తోముకుంటూ, తనని తాను రెండు ప్రశ్నలు వేసుకుంది ఆ రెండింటి సారాంశమూ సుమారుగా ఇది: తెల్లజాతి స్త్రీ వంటింట్లో పనిచేసే నల్లజాతి పిల్ల ఆ డబ్బు ఏంచేసుకుంటుంది? ఈ ఊర్లో ఆనందించడానికి ఏమైనా ఉందా?
ఇప్పుడు నది దిగువగా ఉన్న వీధులన్నిటికీ ఈ అందమైన పిల్ల రూబీ బ్రౌన్ గురించి ఎక్కువ తెలుసు అక్కడ ఎప్పుడూ కిటికీలు మూసి చీకటిగా ఉండే గదుల్లో ఈ పసుపుపచ్చని పిల్ల తన ప్రశ్నలకు సమాధానం వెతుక్కుంటూ బ్రతుకుతోంది. చర్చికి వెళ్ళే నీతిమంతులైన ప్రజలు ఆ పిల్ల పేరు ఇప్పుడు ఉచ్ఛరించరు.
కానీ, ఆ చీకటిగదుల ఇంటికి వెళ్లడానికి అలవాటుపడ్డ తెల్లజాతి పురుషులందరూ వాళ్ళ వంటిళ్ళల్లో ఆమె పనిచేస్తున్నపుడు ఇంతకుముందు ఎన్నడూ ఇవ్వనంతగా డబ్బు ముట్టజెప్ప సాగేరు. .
