కొన్ని కవితలు… ఏమీ లోవెల్, అమెరికను కవయిత్రి
స్థానమహిమ
పండిన బాదం(1) ఆకులమీద
మంచుబిందువు కెంపులా మెరుస్తోంది.
అదే కొలనిలోని తెల్లకలువమీద
కన్నీటిచుక్కలా వెలవెలబోతోంది.
.
అప్పుడే ఒక ఏడు గడిచింది.
మన పెరట్లోని పూదోటనానుకున్న పొలంలో
పాలుపోసుకుంటున్న వరిచేలలో కప్పల బెకెబెక వినిపిస్తోంది
కొడవలిలా(2) పదునైన చంద్రబింబం
నా మనసు రెండుగా చీలుస్తోంది.
.
ఆకురాలుకాలం
పగలల్లా ఎర్రని పండుటాకులు
ద్రాక్షతీగనుండి నీటిలో రాలడం చూస్తూనే ఉన్నా.
ఇప్పుడు వెన్నెట్లోకూడ అవి రాలుతునే ఉన్నాయి.
కాకపోతే, ఇప్పుడు ప్రతి ఆకుఅంచుకీ వెన్నెలపూత ఉంది.
.
జాగరణ
రాత్రల్లా
కీచురాళ్ళు ఉండీ ఉడిగీ అరుస్తూనే ఉన్నాయి
ఆకాశంలో మిణుకుమిణుకుమంటున్న నక్షత్రాల్లా
.
(From: Lacquer Prints)
(Notes:
1. Maple అంటే బాదం కాదు. కానీ, మూలంలోని ఆకుల రంగుకోసం అరువు తెచ్చుకున్నది.
2. చంద్రహాసం వంటి కత్తులు కొడవలి ఆకారంలో ఉంటాయి. కాకపోతే, వాటి లోపలి అంచుకాక, పై అంచు పదునుగా ఉంటుంది. రూపసామ్యంకోసం కొడవలి అని వాడుకున్నా.)
.
ఏమీ లోవెల్
(February 9, 1874 – May 12, 1925)
అమెరికను కవయిత్రి
.
